中國經濟放慢，日本盡「受傷」。

翻譯：廖颯汯。

主要使用腔調：台灣南四縣腔、台灣北四縣腔。

譯文日：十一月廿一日，二〇一五年。
原文日：十一月十七日，二〇一五年。

隨等中國經濟增長趨緩，生和勉金屬製造廠這樣个日本企業生理也出現了下跌。

壹、中國經濟增長放緩衝擊日本企業。

　　生和勉在日本安來市有一家金屬製造廠，對於一千多公里外个中國經濟繁榮，做出過自家細細个貢獻。生和勉同十四名員工生產吔機器精加工齒輪、軸承等部件，有蓋多都安裝在大型慫土機吔引擎裡，最尾到欸中國吔施工場地，慫等中國一日千里个建設步伐。

生和勉表示自家生理受著了中國經濟增長放慢吔影響。

伊講：「中國市場定著係在大幅下跌，吾等感受著了。」

　　毋過，隨等中國經濟增長放慢，生和勉个生理這滿在下跌。歸日本經濟也共樣，這拜一公布个數據顯示，日本經濟在衰退。像小松製造，久保田同日立建機這樣个日本設備製造商，在中國个挖掘機同慫土機銷量出現下滑，故所對生和勉這般吔供應商，採買个零件也減少欸。生和勉估算，建築業訂單今年減百分之四十。

　　「中國市場定著係在大幅下滑，吾等感受著了，」伊講。

　　日本比其他任何發達國家都更加需要一切都在正軌上，才得實現經濟增長。伊總人口同勞動力人口緊在縮減。在成本更低个競爭對手壓力下，家電產業等以前當大个行業緊在收縮。三年前，首相安倍晉三因為承諾加遽日本經濟个新陳代謝因此贏得大選。但今下就算取得欸一細息重大吔成功（失業率處於低位，蓋多大公司也實現了創記錄个利存），共樣壞實現增長同收入个廣泛提速。

　　在經濟位在邊緣个情形下，再細挫敗也可能產生重大影響。上季，對前景抱等慎態个公司削減欸對工廠還有設備个投資，讓經濟進入七年中个第五擺衰退。面向中國吔出口劇降，加大活力衰減，引起普遍不安。

貳、中國經濟放慢也在全世界造成影響。

　　澳司查這（註一）、巴濟（註二）、欸瓜多（註三）這兜大宗商品出口國，看等石油、鐵礦石同其他產品个需求下跌。依賴中國投資資源項目个發展中國家變著盡脆弱。中國用來整高樓大廈同裝備數以千計个工廠个機器中，蓋多都來自日本同碓徐（註四）等國家。對這兜國家來講，製造業可能會承受損失。

　　士丹芙（註五）金融分析公司个全球首席經濟師，波緒．悅（註六）講：「日本供應『中國基礎設施擴張所需个所有東西』」。故所，隨等中國基礎設施擴張个放慢，日本經濟這滿面臨受敗个風險。

　　中國經濟遠遠冇到崩盤个地步。據中國官方估計，今年第三季伊還持等百分之六．九个年化成長率。同毋少加過發達个國家相較，這數勢本本讓人稱羨，但卻係全球金融危機以來，中國經濟增長最低个速度。而且同整體經濟相比，製造、建築同礦業等蓋好摎日本買生產原料个行業，狀況加過差一息。

　　十年前，中國取代了由欸士（註七）變做日本最大个通商國。出口量劇升个砂石車、紡織機械同半導體產品製造業變成欸日本工業亮點。在更加顯眼个消費電子等領域，日本工業失去頭擺个陣地。兩國在商業上相互依賴關係，並冇因為伊等个外交爭端減少。毋過，中、日之間个商業關係在發生改變。中國勞動成本緊升，促成蓋多在該片建廠个日本企業開始分散投資，轉向泰國同印尼等東南亞國家。取代伊个，係日本零售商大量湧向中國。伊等个目標係富裕起來个中國消費者。便利商店同優衣庫等服裝連鎖店在中國遽速張大。

　　常時在中國工作个東京建築設計師椎名友和，最近堵堵對上海歸到日本。伊負責在上海為一間折扣鞋品零售商設計分店。

　　「這兜係平價消費品，今架活躍吔就係這類」伊講。

　　中國消費力集中个另个範圍係東京銀座等日本商業區。在該，中國旅行團遊客个標準配置係加準備一垤空行李箱，用來篼滿伊等買个名牌服裝、提包同電產。日本个中國遊客激增，今年前九隻月就有大約三百八十萬人湧入，比上年同期个多出兩倍。伊等吔消費習慣還產生欸一垤日文新詞──「爆買」。

　　樂購仕電子產品連鎖店，在今年九月為其銀座店新請个幾位中國僱員，董昌源係其中之一。公司共有二十到三十名中國員工，幫助遊客尋自家想愛个空氣淨化器、增溫馬桶座，也係高級電煲。「有兜人一擺買四垤，帶分國內个親戚朋友。」董昌源講。伊還表示，儘管中國經濟增長在放慢，日元疲乏對中國消費者依舊係一大引力。

　　毋久前个一垤下晝，在銀座个一間細型鞋店內，大約十五名中國遊客在查看店內商品。店經理川島一弘表示，中國消費者个人數依然毋低，但伊等買个東西比前幾隻月有所減少。伊講：「過去伊等乜都買，完全係爆買，今架過有選擇性欸。」伊估計中國遊客个人均消費降了大約日元五千個銀（約人民幣二百六十個銀）。

　　零售同旅遊業个增長毋足填補重工業交易萎縮留下个空缺。日本政府公布个通商數據顯示，日本對中國个出口量在今年九月降了百分之三．五，已連續二月落跌。在鋼鐵、汽車配件同工業機械等行業，降幅又加過大。包含刻妄公司（註八）在內，日本幾下間大型企業在過去幾週發佈利存預警時，都摎中國經濟放慢劃做一項影響因素。新日鐵住金（註九）、節富宇控股（註十）等鋼鐵公司，還有半導體製造供應商，也因為來自中國个需求持續下跌，調降了利存預期。

　　「市場復甦愛時間。」刻妄首席財務官田中稔三話分記者。小松製造首席財務官藤冢主夫也表示，公司還「毋清楚」伊在中國市場「哪時會觸底」。

參、中國阻力讓日本政府還難振興本國經濟。

　　安倍晉三提出以中央銀行大力刺激為核心三年期个「安倍經濟學」，擋等國內消費價格指數持續下跌，還借等貶日元促使出口增加。日本失業率目前淨百分之三．四，係廿年來最低點。但波．緒悅表示，這垤計劃「還有一半吂實現」。日本通貨緪縮个情形並冇得著真實个改善，蓋多家庭同企業依然對未來充滿顧慮。

　　根據媒體報導，為著再慫日本經濟一手，安倍政府制定一項價值日圓三．五兆個元个刺激計劃。毋過，持續實施的刺激計畫在政治上當勞搞。安倍決定在二〇一七年四月提高全國性个消費稅。一年半前到今，伊就計劃摎這項稅率提高百分之二，以舒緩經濟增長壓力。日本財務省也希望增加稅收，以償還日本國債。日本債務同經濟規模个比值係全球之最。

　　生和勉在自家个金屬製造工廠裡表示，這政策冇麼會扭轉日本經濟个發展方向。伊講「安倍經濟學」也許會有利於食物鏈頂層个大企業同扼有這兜企業股票个投資者，但對伊這種係型企業毋會有忒大幫助。

　　伊講：「同政策向來都冇麼相干，今架就位在週期中該時間點，必須企穩腳撐過去。」

註釋：
一、Australia，即為澳大利亞。
二、Brazil，即為巴西。
三、Ecuador，即為厄瓜多。
四、Deutschland，即為德意志。
五、原文為「Standard & Poor's，是一間金融分析機構，總部位在美國紐約市。
六、原文為「Paul Sheard」。
七、原文為「United States」的簡寫「U.S.」，即為美利堅。
八、Canon，相機及辦公設備生產商，即為「佳能」。
九、Nippon Steel & Sumitomo Metal，是日本一家鋼鐵公司。
十、JFE，普通話譯為傑富意控股，是日本一家鋼鐵公司。