{客家情懷 後山山前客家情}

[文/V小編]

        大家大體都知臺灣客家人盡多都來自桃竹苗地區，毋過花東地區(吉安、壽豐、鳳林、瑞穗、玉里、池上、關山)介客家人，其實大部分都係原來桃竹苗地區介客人遷徙過去花東介。花東地區客人喊自家待介所在安到『後山』，桃竹苗老祖地安到『山前』。
        吾介老屋公廳原旦在今下關西鎮東十六張，後山老屋在水尾(瑞穗)廣東庄! 涯盡好奇問阿爸，才知得這段故事介主人公係阿公太哦! 阿公太渠原來係關西客家人，講斬蠻純介關西海陸客話，渠後生時節在關西摎人打零工，聽到當時日本政府公告愛招人過後山去開墾移民村介需求，還正經毋知阿公太渠恁大膽，就自家同朋友赴到後山臺東，報尾在水尾一只安到廣東庄介所在落腳。涯兜共樣第四房這下還待關西的姑婆太安到「黃滿娘」，摎吾公歲數差毋多，係阿公太最細介老妹，所以渠介名安到「滿娘」。以前姑婆太時常摎阿公搞共下，是細人時介搞伴。山前後山親戚之間都係來來去去，阿爸也講，阿公在渠還細時，因為公家業務時常愛「轉山前」，都會順儕轉關西探望山前親戚，還會對北部帶等路、細人搞介東西轉來，阿爸、阿姑渠兜就非常歡喜，所以山前、後山情感介連結毋識斷忒。

(水尾廣東庄老屋)

       
        涯有記憶以來，每擺涯兜清明轉關西掛紙，姑婆太定著會打早喊姑丈太打電話喊涯兜中晝一定愛過去食晝，無渠斯會毋歡喜呦！姑丈太、姑婆太渠兩介老人家非常惜情，十分表現出嗯兜客家人的「好客精神」，入門一句「姑婆太、姑丈太，恁久好無」就是濃濃情感的溝通橋樑。前幾年阿公、姑婆太都接續過身，涯兜為著從簡，就無分山前親戚知得阿公過身介消息，一直到「做百日」，關西介姑丈太就算無法度行遠，渠還係愛到後山去分阿公捻香，渠兜老一輩介情感也毋會分時間、距離流忒。

(關西十六張黃屋公廳)

        毋過到涯這代以後，涯房頭內介兄弟姊妹都毋會講客，吾姆妹家介表兄弟姐妹也共樣，山前後山介家族情感也漸漸無咧…涯這下淨係放尞日一有閒，就會對台北騎歐兜麥轉關西公廳行行燒香敬阿公婆，看著公廳後背介公塔，底背放等黃屋來臺歷代祖公介金斗盎，愐著祖先渠兜唐山過海到台灣，甚至到後山開山打林，為家園打拚介精神係毋會變介。不管是山前還係後山，親切的客語譫哆相借問，都是涯客家介情感支持。